厦门+鼓浪屿SM之旅

       我记得鼓浪屿呢个地方响微博兴起之前都无咁hit噶，佢个围脖写得好，然后就一大堆人过去了。今次嘅我地就系自己上网book晒野，火车去飞机翻，都算几穷游，广州出发4日3晚一人落来旅费好似1K左右，不错的体验。
       首先，姑爷负责买火车票，由于我地系提前唔够2个星期买火车票，所以无晒硬卧，得翻D硬座票，所以我地系颠簸左整整14个小时去到厦门嘅。我系第一次搭长途硬座火车，仲要过夜，总嘅来讲，呢个去程俾我嘅感觉就系辛苦+邋遢。自己知自己事，我一直都好怕休息得唔够好，行程中会病倒，但好庆幸无咁嘅事。火车上8个人熙熙攘攘咁嗑嗑瓜子打打扑克，时间都尚算容易过。10点半准时落车，开始我地嘅厦门市区之旅。

                                                            大名鼎鼎嘅厦门站
       一落车我地就去下榻嘅7仔check in，8个人订2间家庭房，唔会觉得逼，因为本身7仔嘅床就系比较大嘅。梳洗完毕都到中午时间，我地本身就系为左方便所以订嘅系厦门最热闹嘅步行街中山路附近嘅酒店。但系坑爹嘅系，估唔到呢条步行街人流非常少，唔知系咪因为习惯左广州嘅拥堵，呢度嘅人流量实在令我哋惊讶啊~！只有上下九或者北京路清晨时分嘅人流量咁上下。我地去左一间有得食沙茶面嘅小店，类似广州嘅银记咁嘅规模（其实厦门每一间呢类型嘅小店都一定有沙茶面食，而且都系斋面一个价钱，然后你中意加咩料就自己同店员讲，加料大概就系海蛎、虾之类嘅海鲜，1蚊就加一样），我地叫左一人一碗沙茶面同埋两只烧肉粽，沙茶面嘅汤底好正，广州真系无呢只味，阿花同我都想买一盒酱翻广州可以自己整来食；而烧肉粽呢，就比较有特色，不过就好多肥猪肉，唔系咁啱我地口味。

                                                                     加卤蛋嘅沙茶面 
       

                                                                    麻麻地嘅烧肉粽         食完野，粗略咁行过人烟疏落嘅步行街，我地就准备搭车去厦大。途中尝了厦门有名的小吃“土笋冻”，讲真，姐姐系唔中意食笋的，但千里迢迢来到，点都要试一下。但原来呢个所谓嘅土笋冻系好似钵子糕咁，但里面包住嘅就系好似土笋嘅海洋生物，问当地人都讲唔出个名俾我地听，然后外面会再撒上真正的笋，我觉得都几好味的，唔似钵子糕咁烟韧，但入口好爽，而且外面嘅果一层膏状系好冻咁的，所以好有嚼头同口感。我地行完成条中山路（其实也就15分钟点都行完），就到左我地要搭个车站了。车站附近见到好有名嘅“八婆婆烧仙草”，呢间铺每一次经过都系咁多人排队（我地来回响佢附近几次）。所谓嘅烧仙草其实系首先预调左仙草同埋糖浆做底，然后当有客人来嘅时候，就会加上花生等等好多嘅特色拌料同埋香浓嘅奶茶响上面而成，系要用汤匙食嘅，其实最中意D奶茶同仙草，我觉得好正咯~~~

                                                                       各种size嘅土笋冻    

                                                             拣好之后店家会帮你加D配料
                                                     

八婆婆烧仙草(加州店)

                          八婆婆烧仙草，次次经过都见到佢排晒长龙，店面非常细，成间店只卖一种食物
      
         搭公车由中山路去厦大其实唔系好远，而且厦门唔会塞车，大概也就15分钟左右可以到了。我地本来嘅打算系搭缆车上山先，然后夜晚先行厦大的，但系问过路人话我地落车嘅地方无缆车，所以就放弃左，直接入南普陀寺。  南普陀寺就响厦大旁边，寺内无香火，人颇多，多数都系旅行团嘅人，到处都可以见到导游嘅身影。入寺唔需要门票，寺庙亦唔大，行左15分钟左右我地就无行了，大家都唔系算咩诚心嘅善信。不过去到嘅人都比较自觉咁添香油钱，同埋寺内有南普陀寺素饼，几乎每位游客都买到，我地就无买了，因为费事摞住行，我地仲要行旁边嘅厦大的。
       厦大环境唔错，对于毕业时间尚算短嘅我来讲，勾起无数读书时候嘅果种宁静、纯粹嘅记忆。响闲逛途中，见到有间几有feel嘅咖啡店，里面都系D学生响度上网、读书&拍拖，环境极好，但系饮品性价比就一般了，size好细，不过我就觉得都几好饮咁嘅。最后响厦大门口，买左几叠明信片同埋一本《鼓浪屿盖章游记》，呢本野犀利了，响我地后来上岛嘅时候，发现佢系多么多么的有用，而明信片我就觉得有D后悔，应该上岛先买，稍后会提到原因。
 

                                           呢间cafe'好有情调，不过收费亦唔便咯~~~   
              

                                                                 厦大门口到此一游

        而刘生嘅女朋友由于商家特别nice嘅关系帮我地订左一间好出名嘅大排档食饭。我地就搭车去搵果间铺了，但厦门嘅路牌实在坑爹得很，门牌号码系唔连号嘅，而且同一条路同一个号码系有两个地方，搵到我地摊摊腰，历尽千辛万苦好唔容易咁先去到我地食饭嘅饭店“正元”。厦门嘅大排档点送系无菜牌嘅，需要去到D海鲜面前当面讲，不过唔知系咪因为熟人定位嘅关系，都唔系食左好多钱。菜色基本上都系海鲜为主，因为近海嘅关系都几新鲜，果度嘅特色菜系“酱油水”，其实就系蒸鱼嘅时候放好多酱油来蒸？具体做法唔清楚了，但系“酱油水”呢种做法都系蒸鱼，佢地都唔系咁中意食鱼吧，系几多骨下，我就觉得唔会特别好味咯，反而更加中意广东人嘅蒸鱼法。仲有一个紫菜卷觉得几好味，紫菜包住肉卷来炸，好脆好有口感。

                                               福建特产酱油水（可以系好多种唔同嘅鱼）  

                                                        好平嘅花蛤，我哋几乎每餐都点
 

                                                        呢个鱿鱼因为新鲜，所以好正！

                                                          紫菜&腐皮卷，脆脆的，正！ 

                                                                   每餐必点炒米粉

       饭后我地去左一个叫做“顶澳仔”嘅地方谂住试下果个出名嘅coffe shop。宜家谂翻起，我觉得顶澳仔系一个缩小版嘅鼓浪屿，大概100米左右嘅地方有好多小店，都系卖小精品同埋衫等。女仔们响呢度行左好耐，行到人地关门大概10点左右，谂住再去试咖啡，然后两位男士好无情咁同我地讲“我地等你地太耐啦，直接入去坐啦，间野出品好一般，无咩必要试啊”，所以我地就直接搭车翻中山路了。
 

                      好有澳门街道feel嘅顶澳仔，有好几间好靓嘅小店，有点“小鼓浪屿”嘅感觉 

       去到酒店附近嘅中山路，我地又继续再食过（本来食饭嘅时候就预备左食少D，因为要晚上翻去食宵夜）。落车嘅地方有一间叫“好成财”嘅专食牛肉嘅店尝试一下，我地点左一个一支牛排、一个牛三星、一个萝卜牛杂汤同一个牛肉羹，全部都好好味，果个牛排煎得好入味，虽然唔系黑椒，但系都好香口；牛三星我就一向都唔中意嘅，但系我爱果个汤，一饮就feel到果种“好补”嘅口感，唔知点样形容，但系就全身都热晒嘅；然后果个萝卜牛杂呢，D萝卜虽然切得比较细，但系唔会好似广州嘅牛杂咁煮得够淋，我就觉得唔够入味，D牛杂都还可以；最好味嘅就系果个牛肉羹，D牛肉切得比较细，应该煮熟左再滚咁，所以好淋，一咬就烂，D汤就系清甜果种味，牛肉汤可以做到清甜，我真系觉得好特别而且真系好好味，非常值得尝试（虽然唔知系咪厦门特产）。本来食完牛之后仲谂住去附近嘅果条食街继续宵夜的，但系唔知系厦门人都好早训觉呢定系我地唔识搵，总之我地横穿成条中山路都只系见到已经关门嘅铺头了。

                                             从左到右依次系一只牛排、萝卜牛杂汤、牛肉羹 
       翻到7仔舒舒服服咁冲凉训觉，第二日又开始了，我地嘅plan系去环岛路踩单车，所以8:30就出门口了。早餐响7仔附近嘅一间小店解决，又系沙茶面，仲多左一个海蛎煎。个海蛎煎真系超正，相当于广州嘅蚝仔乐，而且好多海蛎，好足料，食过翻寻味啊~！

       环岛路上有一个沙滩，附近有更衣室等但系唔知点解系关门嘅，唔知系咪因为呢个原因所以果度都无咩人游水，但系依然可以见到中国人要揾钱嘅决心---附近有几处水上活动例如水上电单车可以俾D游客玩嘅。由于我地都无带泳衣，所以都无心去了解。沙滩D沙好舒服好细好软，我地个个都除晒鞋提起裤脚玩水影相咁，毕竟常住广州嘅我地比较少机会见到海。影左一阵相之后就正式开展我地嘅单车之旅，沙滩附近有好多租单车嘅铺头，据说如果环厦门岛一圈需要一天，我地就只系踩左一个钟左右就停止了，因为我地赶住去鼓浪屿。
       翻到酒店check out嘅时候，实在太饿了，响7仔隔离嘅一间专食炸鸡嘅小店果腹左半顿，阿花话仲好食过K记，基本上K记有嘅野佢都有咯。可惜奶茶就差左D。
                                                 

       搞下搞下我地大概系4点几5点先去到轮渡，可能系因为星期日嘅原因，所以入岛嘅人少出岛嘅人多，坐大概10分钟左右嘅船就到左鼓浪屿了，然后我地就大包细包咁去搵我地嘅青年旅社。第一次住青旅，觉得呢度感觉真系好唔同。首先，青旅系好似宿舍咁嘅，以床位来出租，￥70一个床位，响鼓浪屿上面算系比较便宜的。房间分4、6、8人间，4人间只住女生，其他嘅就系男女混住嘅。一间房有一个洗手间，房间设施就系一个床位加一隔柜。成间旅馆有一个公用小客厅，有梳化有电视有台咁，算系一个简单嘅起居室。然后有一个类似西关大屋嘅小天井，晚上会有D住客响果度倾计嘅（基本都系互相去到果度先认识嘅）。3层嘅青旅最顶层有一个天台，可以晾衫，我觉得好有田园感觉。话明系青旅宿舍，当然就需要自己铺床啦，估唔到经过4年嘅时间，竟然中有咁多团友系唔识自己铺床嘅，真系唔明佢地系点样过来嘅。

厦门鼓浪屿国际青年旅舍

       搞掂晒D野之后，我地就开始游历浪漫嘅鼓浪屿了，呢个时候，响厦大买嘅果本游记就用得着了。鼓浪屿其实唔系好大，岛上好少见到单车嘅身影，因为基本上徒步一个钟左右都可以环岛行一圈了。 游记上面介绍有48间特色嘅小店，每一页都有一间小店嘅图片、附近地图同埋简介，摞住本野来游历鼓浪屿俾我一种探险嘅感觉。本子上面每一间小店都有一个该店嘅印章，印满嘅话就基本上可以行晒特色嘅小店了。而每一间店都有自己特色嘅装横，买嘅野亦好靓，有D亦好有特色，不过价钱亦唔平，可以拍得住广州嘅。每一间店无论系卖乜嘢都好，都唔会少得卖明信片嘅，就算系卖野饮嘅铺头（当然，家庭作坊嘅纯粹嘅小食店就无呢D咁文艺嘅野卖咯）都有得卖，甚至可以提供埋代寄服务。除左代寄服务，仲有一个慢寄，系寄去未来嘅，将来收到系点样一种心情呢？
                                  

        除左特色嘅小店，岛上仲有好多嘅果汁店，果汁都系鲜榨的，有杨桃、橙、马拉桑等，价钱大概就系￥10一杯，好抵，因为真系望住佢手榨出来的，完全无混水入去，而且由于新鲜嘅原因，都好甜。
       晚上我地去左一间家庭作坊嘅小店解决温饱（其实岛上除左呢D家庭作坊嘅小店之外都仲有麦记K记必胜记的），还是老样子---海鲜。果几日我地几乎每一餐都食海鲜，包括花蛤、蚝等，仲有必点嘅炒米粉。唔知系咪因为比较符合广东人口味，所以食得都好丰富好得。食完之后我地去到微薄上好有名嘅“娜娜”泡夜店（至于点解出名，我就唔知道啦~~~）。

       第二日可以训晏D，9：30出发又继续去鼓浪屿嘅沙滩。不过呢度嘅沙滩就唔够厦门果个靓了，D沙比较邋遢同埋唔够细。

                                                               团友们2了一把~ 

       中午check out完又再食过一个海鲜餐，然后下午继续盖未盖完嘅章。我觉得摞住本野，我就好有冲动要盖完佢，好有feel。响搵呢D要盖章嘅小店嘅途中仲试左好多野，潘小莲嘅芒果酸奶、张三疯嘅有渣奶茶、怕怕嘅杨桃冰、babycat嘅绿豆酥饼、卢阿么的红茶饼同花果茶，全部都想带翻屋企，可惜我唔够钱了啦~~！！！而且有一个好重要嘅point，果度系唔可以look卡的，全部都唔可以，所以下次去一定要带够足够嘅cash去！

       行完之后我觉得鼓浪屿就系一个大型嘅工艺品市场一样，除左小店之外，仲有一样特色嘅野就系小旅馆。由于鼓浪屿以前系一个殖民地，系多个国家嘅租界，所以上面随处可见异国风情嘅建筑风格笼罩住个小旅馆。每一间旅馆大概都系3-4层左右，房间数以唔多，而且类似我地入住嘅路飞青年旅社亦有几间，好适合一个人去旅游探险。如果有唔开心或者想换一个心情，我个人系比较推荐去的。

       行程嘅最后就系搭飞机舒舒服服咁翻来了。厦门嘅高崎机场都几新几靓，我地由轮渡搭的士去到机场大概系用作50蚊左右，的士司机话呢个价钱响厦门来讲已经系好贵了，因为厦门岛本来就系好细，如果搭BRT嘅话，0.5元起标，2-3元基本已经系出左厦门岛了。搭飞机时间大概一个钟就翻到可爱嘅广州了，收拾心情上班去咯~~~~